1 აპრილს კომპანია „აჭარისწყალი ჯორჯიას“ თანამშრომლებმა“April Cool” კამპანიის ფარგლებში ხეების დარგვის აქცია გამართეს. კერძოდ, ზამლეთის სანაყაროზე 40 ძირი მუხისა და კაკლის ნერგები დარგეს. აქციის მიზანია სამშენებლო ტერიტორიის აღდგენა და ტყის განაშენიანების ხელშეწყობა.
მსგავს ღონისძიებას კომპანია მომავალშიც განახორციელებს.
მიმდინარე წლის 4 მარტს „შუახევი ჰესზე“ გაიმართა სახანძრო უსაფრთხოების ტრენინგი,რომელიც შედგებოდა თეორიული და პრაქტიკული მეცადინეობისაგან. შპს „სახანძრო უსაფრთხოებისა და მომსახურების“ წარმომადგენლებმა „შუახევი ჰესის“ ოპერირების გუნდსა და სამშენებლო ბანაკების დაცვის სამსახურის თანამშრომლებს მიაწოდეს ინფორმაცია ისეთ საკითხებზე, როგორიცაა საგანგებო სიტუაციების მართვა, პერსონალის ევაკუაცია ხანძრის დროს, ხანძრისა და ცეცხლმაქრების კლასიფიკაცია, ასევე ჰიდროელექტროსადგურის სავენტილაციო და სახანძრო უსაფრთხოების სისტემებზე.
პრაქტიკული მეცადინეობების დროს სიმულირებული იყო ღია ცეცხლი, რომლის ჩაქრობა მოხდა სხვადასხვა სახის ცეცხლმაქრებით (ფხვნილოვანი, ნახშიროჟანგოვანი, ქაფოვანი), აგრეთვე ნაჩვენები იყო სახანძრო ჰიდრანტების მუშაობის პრინციპები და გამოყენების წესები.
მიმდინარე წლის 19-20 თებერვალს „აჭარისწყალი ჯორჯიას“ აღმასრულებელმა დირექტორმა პრაშანტ ჯოშმა მონაწილეობა მიიღო თბილისში გამართულ საერთაშორისო კონგრესში: „ჰიდროენერგეტიკა კასპიის რეგიონსა და ცენტრალური აზიაში 2019“. ყოველწლიური საერთაშორისო კონგრესი და გამოფენა წარმოადგენს პროფესიონალურ პლატფორმას მაღალი რანგის წარმომადგენლების დიალოგისა და ჰიდროელექტროსადგურების მშენებლობისა და ოპერირების ფარგლებში დაგროვილი ცოდნისა და გამოცდილების გაზიარებისთვის. პრაშანტ ჯოშმა ისაუბრა „შუახევი ჰესის“ მაგალითზე გარემოსდაცვით და სოციალურ პასუხისმგებლობაზე. თბილისში გამართულ საერთაშორისო კონგრესში „ჰიდროენერგეტიკა კასპიის რეგიონსა და ცენტრალურ აზიაში“ მონაწილეობა მიიღო 150-ზე მეტმა სტუმარმა სხვადასხვა ქვეყნიდან.
მომდევნო დღეს ბატონი ჯოში ასევე დაესწრო საქართველოს ბანკისა და „გალტ & თაგარტის“ ერთობლივ კონფერენციას თემაზე „ენერგო სექტორის პერსპექტივები.“
კომპანია „აჭარისწყალი ჯორჯიამ“ სკოლის მოსწავლეებთან ცნობიერების ამაღლებისა და საინფორმაციო შეხვედრები დაიწყო. 21 დეკემბერს პირველი შეხვედრა ჩატარდა სოფელ დიდაჭარის საჯარო სკოლის მე-9, მე-10 და მე-11 კლასის მოსწავლეებთან. შეხვედრის თემას წარმოადგენდა – კომპოსტირება – ორგანული პროცესი, რომლის დროსაც ხდება ორგანული ნივთიერებების, კერძოდ კი ორგანული ნარჩენების (ხილი, ბოსტნეული, ჩამოცვენილი ფოთლები) ბუნებრივი დაშლა, რომლის შედეგად მიღებულ მასას შეუძლია გაამდიდროს ნიადაგი და გამოიყენება ორგანულ მეურნეობაში, როგორ მოვამზადოთ კომპოსტი, მისი გამოყენების მნიშვნელობა და ა.შ.
დიდაჭარის სკოლის ბავშვებთან შეხვედრის შემდეგ 25 დეკემბერს საინფორმაციო შეხვედრა გაიმართა სოფელ ახალდაბის სკოლის მოსწავლეებთან.
კომპანია „აჭარისწყალი ჯორჯია“ სკოლის მოსწავლეებთან საინფორმაციო შეხვედრებს სხვადასხვა თემებზე სამომავლოდაც გააგრძელებს.
კომპანია „აჭარისწყალი ჯორჯია“ ეხმაურება ხულოსა და შუახევის მოსახლეობის წუხილს მდინარე აჭარისწყალში თევზის რაოდენობის შემცირების თაობაზე. აქვე განვმარტავთ, რომ ჩვენი კომპანია 2013 წლიდან დღემდე ახორციელებს მდინარის ჰაპიტატების, კერძოდ თევზების და წყლის მაკროუხერხემლოების კვლევასა და მონიტორინგს. მონიტორინგი ხორციელდება 15 სადგურზე, წელიწადში 4-ჯერ როგორც მდინარის წყალმცირობის, ასევე წყალუხვობის პერიოდში. მონიტორინგი ითვალისწინებს კამერალურ კვლევებს, საველე კვლევებს, მოპოვებული მასალის ლაბორატორიულ დამუშავებასა და ანამნეზს. მონიტორინგის შედეგებზე დაყრდნობით შეგვიძლია ვთქვათ, რომ ამ ეტაპისათვის მნიშვნელოვანი ცვლილებები მდ. აჭარისწყლის აუზის იქთიოცენოზის სტრუქტურაში არ შეინიშნება. მონიტორინგის 2013-2017 წლების კვლევის მონაცემებს შორის აღნიშნული სხვაობა კოლხეთის მთის ტიპის მდინარეთათვის სახასიათო წლიური ფლუქტუაციების ფარგლებშია. ასევე აღსანიშნავია, რომ შუახევის ჰიდროელექტროსადგური ჯერ ექსპლუატაციაში არ შესულა და შესაბამისად, პროექტს არ შეიძლება რაიმე ზემოქმედება ქონდეს თევზის რაოდენობის შემცირებაზე.
კომპანია „აჭარისწყალი ჯორჯიამ“ ხულოს მუნიციპალიტეტის სოფელ დიდაჭარაში სადრენაჟო სისტემის მოწყობა დაასრულა. ახალი სადრენაჟო სისტემის შედეგად მოხდება მიწისზედა წყლების პირდაპირი გადინება და ამგვარად შემცირდება მიწის ნაკვეთების დატბორვის რისკი. სადრენაჟო სისტემის პროექტი შემუშავებულ იქნა „აჭარისწყალი ჯორჯიას“ ინჟინრების მიერ, ხოლო ხულოს მერიამ დახმარების მიზნით გამოყო მძიმე ტექნიკა.
აღნიშნული პროექტის შედეგად დამონტაჟდა:
– 42 მ 270 მმ-იანი გოფრირებული მილი;
– ასევე, 42 მ 100 მმ-იანი გოფრირებული მილი;
– ასევე მოეწყო 60 მეტრის ღია არხი.
გარდა ამისა, გაკეთდა ცენტრალური გზიდან სოფელთან დამაკავშირებელი 25 მ-იანი საცალფეხო ბილიკი.
აღნიშნულ სამუშაოებში ჩართული იყო 4 ადგილობრივი მაცხოვრებელი, სამშენებლო სამუშაოების ზედამხდეველობას უწევდნენ კომპანიის ინჟინრები. ახალი სადრენაჟო სისტემით 40 ოჯახი ისარგებლებს.
კომპანია „აჭარისწყალი ჯორჯიას“ აღმასრულებელმა დირექტორმა პრაშანტ ჯოშმა მონაწილეობა მიიღო განხილვაში თემაზე: „ჰიდროენერგეტიკის განვითარება თანამედროვე ტექნოლოგიებისა და მიდგომების გათვალისწინებით“, რომელიც გაიმართა ბათუმში, 11 სექტემბერს „ცენტრალური აზიის რეგიონალური ეკონომიკური თანამშრომლობის“ (CAREC) რიგით მესამე საინვესტიციო ენერგეტიკულ ფორუმის ფარგლებში. ბატონმა ჯოშმა თავის გამოსვლაში ხაზი გაუსვა ჰიდროენერგეტიკაში თანამედროვე ტექნოლოგიების გამოყენების მნიშვნელობას და ასევე, ისაუბრა იმ გამოწვევებზე, რაც ჰიდროენერგეტიკას აქვს ჩვენს პერიოდში. „ენერგეტიკული პროექტების განხორციელება სულ უფრო და უფრო რთული ხდება, რაც განპირობებულია გარემოსდაცვითი და სოციალური ზეგავლენებზე ცნობიერების ამაღლებით და ასევე, ბაზრის ცვლილების სწრაფი ზრდით. ტექნოლოგიური წინსვლა უნდა დაბალანსდეს პროექტის განვითარების ყველა ეპატზე – კონცეპტუალიზაციის, დიზაინის, მშენებლობის და ოპერირების ფაზებზე “, – განაცხადა ბატონმა ჯოშმა. მან ასევე აღნიშნა, რომ თანამედროვე ტექნოლოგიების გამოყენება არ უნდა იყოს ფოკუსირებული მხოლოდ კაპიტალისა და საოპერაციო ხარჯების შემცირებაზე, არამედ პასუხობდეს გარემოსდაცვით და სოციალურ მოთხოვნებს, ბაზრის დინამიურ საჭიროებებსა და ჰესზე მომუშავე პერსონალისა და აღჭურვილობის უსაფრთხოებას.
დისკუსიაში მონაწილეობა მიიღეს „ცენტრალური აზიის რეგიონალური ეკონომიკური თანამშრომლობის“ (СAREC) წევრი ქვეყნების (საქართველო, აზერბაიჯანი, ჩინეთი, პაკისტანი, ავღანეთი, ყაზახეთი, ყირგიზეთი, თურქმენეთი, უზბეკეთი, ტაჯიკეთი და მონღოლეთი) დელეგაციებმა. გარდა ამისა, შეხვედრაზე მოხსენებებით გამოვიდნენ მსოფლიო ბანკის, ევროპის რეკონსტრუქციისა განვითარების ბანკის და USAID-ის წარმომადგენლები.
საინვესტიციო ფორუმი ორ დღეს გაგრძელდა, რომლის მიზანი იყო „ცენტრალური აზიის რეგიონალური ეკონომიკური თანამშრომლობის“ (СAREC) წევრი ქვეყნებისთვის ენერგეტიკის ახალი ტექნოლოგიების გაცნობა, შესაბამისი პოლიტიკური რეფორმების გატარების და ენერგეტიკის სექტორში ინვესტიციების მოზიდვის მხარდაჭერა.
10 სექტემბერს „აჭარისწყალი ჯორჯიამ“ შუახევის ჰიდროელექტროსადგურში „ცენტრალური აზიის რეგიონალური ეკონომიკური თანამშრომლობის“ (CAREC) წევრი ქვეყნების (საქართველო, აზერბაიჯანი, ჩინეთი, პაკისტანი, ავღანეთი, ყაზახეთი, ყირგიზეთი, თურქმენეთი, უზბეკეთი, ტაჯიკეთი და მონღოლეთი) საინვესტიციო ენერგეტიკული ფორუმის დელეგაციას უმასპინძლა. კომპანიის აღმასრულებელმა დირექტორმა პრაშანტ ჯოშმა მოწვეულ სტუმრებს გააცნო შუახევის პროექტი, უპასუხა დასმულ კითხვებს, რის შემდეგაც სტუმრებმა დაათვალიერეს შუახევის ჰესი.
„აჭარისწყალი ჯორჯია“-ს სოციალური დეპარტამენტის თანამშრომლებმა საერთაშორისო არასამთავრობო ორგანიზაცია „World Vision“-ის წარმომადგენლებს უმასპინძლეს. შეხვედრის ძირითადი მიზანი იყო კომპანიის სოციალური პასუხისმგებლობის ფარგლებში განხორციელებული საქმიანობების გაცნობა და სამომავლო თანამშრომლობის გზების დასახვა. სტუმრებმა ასევე შუახევის ჰიდროელექტროსადგურიც დაათვალიერეს.
არასამთვარობო ორგანიზაციის და „აჭარისწყალი ჯორჯია“-ს წარმომადგენლები შუახევის მუნიციპალიტეტის მერს ბატონ ფრიდონ ფუტკარაძესაც შეხვდნენ, სადაც განიხილეს შშმ პირთა პრობლემები რეგიონში და შშმ პირთათვის დღის სარეაბილიტაციო ცენტრის მოწყობის, კერძოდ კადრების გადამზადება – დასაქმების საკითხიც. შეხვედრის შემდეგ მხარეებმა შშმ პირთა დღის სარეაბილიტაციო ცენტრის მშნებლობაც დაათვალიერეს.
18 დეკემბერს კომპანია „აჭარისწყალი ჯორჯია“-ს თანამშრომლებმა შუახევი ჰესის მიმდებარე ტერიტორიაზე ხეები დარგეს. აღნიშნული ღონისძიება კომპანიის სოციალური პასუხისმგებლობის ერთ-ერთი შემადგენელი ნაწილია და ხელს უწყობს ეკოლოგიურად სუფთა გარემოს შექმნაში საკუთარი წვლილის შეტანასა და ასევე კომპანიის თანამშრომელთა გუნდურობის ჩამოყალიბებას.
„აჭარისწყალი ჯორჯია“-ს თანამშრომლებმა სხავდასხვა ადგილობრივი ჯიშების ნერგები დარგეს, როგორიცაა მუხა, კაკალი, ფიჭვი და ა.შ. ჯამში 70 ნერგი.
კომპანია სოციალური პასუხისმგებლობის ფარგლებში მსგავსი აქციების გამართვას მომავალშიც გეგმავს.
